Gu ta gutarrak

Zazpi Eskaleren esperientzia onaren ondoren, Igor Elortza eta Unia Iturriaga bertsolariak eta Josu Zabala musikaria (Hertzainak) berriz elkartu ziren Gu ta Gutarrak egitasmoa sortzeko. Oraingoan ere bertsoa eta herri musika izan ziren ikuskizunaren ardatza, baina musika bertsora moldatu zuten. 2007ko otsailetik 2008ko ekaina bitartean aritu ziren saioak eskaintzen, eta emanaldi bakoitzak berezitasun bat zuen: tokiko lagun sortzaile bat gonbidatzen zuten taulara. Durangoko Plateruena kafe antzokian eskaini zuten azken emanaldia, eta hori jasotzen du Despedidea DVDak.